• സാമൂഹ്യസേവനം
• നൈപുണ്യവികസനം

സാമൂഹ്യസേവനം- നൈപുണ്യവികസനം

കഴിഞ്ഞ രണ്ടു ദശാബ്ദ കാലമായി കേരളത്തിന്റെ വളര്‍ച്ചാ നിരക്ക് ദേശീയ ശരാശരിയ്ക്കു മുകളില്‍ സ്ഥിരതയോടെ നിലകൊള്ളുന്നു. വന്‍തോതില്‍ സേവന മേഖലയിലധിഷ്ടിതമായ സമ്പദ് വ്യവസ്ഥയിലേക്ക് നയിച്ച ഈ നേട്ടത്തിന് പ്രോത്സാഹനമായത് പ്രധാനമായും സമ്പദ് വ്യവസ്ഥയുടെ ഘടനയിലുണ്ടായ മാറ്റമാണ്. ഇരുപതാം നൂറ്റാണ്ടിന്റെ ആദ്യ കാല കാര്‍ഷിക സമ്പദ് വ്യവസ്ഥയില്‍ നിന്നും വളരെ സവിശേഷമായ മാറ്റമാണിത്. 72 ശതമാനത്തിലേറെ നാഗരിക പുരുഷ തൊഴില്‍ ശക്തിയും 68 ശതമാനത്തിലേറെ നാഗരിക സ്ത്രീ തൊഴില്‍ശക്തിയും സേവന മേഖലയിലാണ് (എന്‍.എസ്.എസ് 2009-10), എന്നത് തൊഴില്‍ ഘടനയില്‍ വളരെ വ്യക്തമായി കാണാവുന്നതാണ്. അതിന് തത്തുല്യമായി ഗ്രാമീണ മേഖലയിലെ പുരുഷ/സ്ത്രീ നിരക്ക് യഥാക്രമം 57 ശതമാനവും 38 ശതമാനവുമാണ്. എന്നിരുന്നാലും ഉയര്‍ന്നു വരുന്ന മേഖലകളില്‍ വന്‍തോതില്‍ തൊഴിലവസരങ്ങള്‍ സൃഷ്ടിക്കുന്നതിന് സമ്പദ് വ്യവസ്ഥയിലുള്ള ഘടനാപരമായ മാറ്റം പര്യാപ്തമല്ല. സംസ്ഥാനത്തിന്റെയും രാജ്യത്തിന്റെയും വളര്‍ച്ചയ്ക്കും വികസനത്തിനും സംഭാവന ചെയ്യാന്‍ കഴിയുന്ന നൈപുണ്യവും സാങ്കേതിക യോഗ്യതയുമുള്ള തൊഴില്‍ ശക്തി സൃഷ്ടിക്കുന്നതിനും സര്‍ക്കാര്‍ ലക്ഷ്യമിടുന്നു. ഒപ്പം 2022 ഓടു കൂടി 500 ദശലക്ഷം നൈപുണ്യമുള്ള വ്യക്തികളെ സൃഷ്ടിക്കുക എന്ന ദേശീയ ലക്ഷ്യം നേടാനും ഗുണമേന്മയുള്ള പരിശീലനം നൽകിക്കൊണ്ട് തൊഴിലില്ലായ്മ കുറയ്ക്കാനും ലക്ഷ്യമിടുന്നു. കേരളത്തില്‍ പഠിച്ചിറങ്ങുന്ന ബിരുദ ധാരികളുടെ എണ്ണം വര്‍ദ്ധിച്ചു വരുന്നത് അടിസ്ഥാനമാക്കി ദേശീയ ലക്ഷ്യത്തിനൊപ്പ മെത്താന്‍ വര്‍ഷം തോറും 1.5 മുതല്‍ 2 ലക്ഷം വരെ മനുഷ്യ വിഭവത്തെ നൈപുണ്യമുള്ളവരാക്കുവാന്‍ പരിശീലിപ്പിക്കേണ്ടതുണ്ട്.

കേരളത്തിന്റെ നൈപുണ്യ വികസന പാന്ഥാവില്‍ സമീപ വര്‍ഷങ്ങളില്‍ മികവ് കാണാന്‍ കഴിയുന്നുണ്ട്. എന്നാല്‍ കേരളത്തിലെ നിലവിലെ നൈപുണ്യ പരിശീലന സ്ഥാപനങ്ങളുടെ പദവി ഇന്നും അന്തര്‍ദേശീയ നിലവാരത്തെക്കാള്‍ താഴെയാണ്. സംസ്ഥാനത്തിന്റെ വിവിധ നൈപുണ്യ വികസന സംരംഭങ്ങളെ ഏകോപിപ്പിക്കുന്നതിനും സുഗമമാക്കുന്നതിനും കേരള അക്കാഡമി ഫോര്‍ സ്കില്‍ എക്സലന്‍സ് (കെയിസ്) എന്ന ലാഭേശ്ചയില്ലാത്ത കമ്പനിയെ കേരള സര്‍ക്കാര്‍ നോഡല്‍ ഏജന്‍സിയാക്കിയിട്ടുണ്ട്. ഇതിലൂടെ കേരളത്തിലെ യുവ തൊഴില്‍ ശക്തിയെ നൈപുണ്യമുള്ളവരാക്കുന്നതിനും ഇന്ത്യയിലും വിദേശത്തും തൊഴില്‍ ചെയ്യുന്നതിന് പ്രാപ്തമായ ലോക നിലവാരത്തിലേക്ക് അവരുടെ നൈപുണ്യങ്ങള്‍ ഉയര്‍ത്തുന്നതിനും ലക്ഷ്യമിടുന്നു. മറ്റൊരു സംരംഭമാണ് അധിക കഴിവ് സ്വായത്തമാക്കല്‍ പദ്ധതി (അസാപ്പ്). വ്യാവസായ പ്രാധാന്യമുള്ള തൊഴില്‍ നൈപുണ്യങ്ങള്‍ പകര്‍ന്നു കൊടുക്കുന്നതിലൂടെ ഗുണഭോക്താക്കള്‍ക്ക് പ്രധാന ആശയ വിനിമയ മേഖലകളില്‍ തൊഴില്‍ സാദ്ധ്യതകള്‍ വിപുലപ്പെടുത്തുന്നതിന് അസാപ്പ് ലക്ഷ്യമിടുന്നു. ഹയര്‍ സെക്കന്ററി വിദ്യാര്‍ത്ഥികളും ഉടന്‍ ജോലി അന്വേഷിക്കുന്ന ബിരുദതലത്തിലെ വിദ്യാര്‍ത്ഥികളുമാണ് ഈ പദ്ധതിയുടെ പ്രധാന ഗുണഭോക്താക്കള്‍. സംസ്ഥാനത്തുടനീളം 949 വിദ്യാഭ്യാസ സ്ഥാപനങ്ങളിലൂടെ 25,528 വിദ്യാര്‍ത്ഥികളെ ഉള്‍പ്പെടുത്തി കൊണ്ട് 22 വ്യവസായ മേഖലകളിലായി 76 നൈപുണ്യ കോഴ്സുകള്‍ അസാപ്പ് നല്‍കുന്നു. സമീപകാലത്ത് ശ്രദ്ധാര്‍ഹമായ അസാപ്പിന്റെ മറ്റൊരു സംരംഭമാണ് കമ്മ്യുണിറ്റി സ്കില്‍ പാര്‍ക്കുകള്‍ സ്ഥാപിക്കല്‍. സംസ്ഥാനത്തെ ഓരോ നിയമസഭ മണ്ഡലങ്ങളിലും ഓരോ കമ്മ്യൂണിറ്റി സ്കില്‍ പാര്‍ക്കുകള്‍ സ്ഥാപിക്കുന്നതിന് പദ്ധതി ലക്ഷ്യമിടുന്നു. ഐ.റ്റി.ഐയിലെ വിദ്യാര്‍ഥികള്‍ക്കും എംബ്ലോയ്മെന്റ് എക്സ്ചെഞ്ചില്‍ പേര് രജിസ്റ്റര്‍ ചെയ്തിട്ടുള്ളവര്‍ക്കും അധിക കഴിവ് വളര്‍ത്തല്‍ (അസെപ്പ്) പദ്ധതി വികസിപ്പിച്ചിട്ടുണ്ട്. ഇതുകൂടാതെ സംസ്ഥാനത്ത് തൊഴില്‍ പരിശീലനം നല്‍കുന്നവരുടെ സഹായത്തോടെ മോഡുലാര്‍ തൊഴില്‍ നൈപുണ്യ പദ്ധതിയും നടത്തുന്നുണ്ട്. ദേശീയ ഗ്രാമീണ ഉപജീവന (എന്‍.ആര്‍.എല്‍.എം) മിഷനിലൂടെ നടപ്പാക്കുന്ന കേന്ദ്രാവിഷ്കൃത നൈപുണ്യ വികസന പദ്ധതിയാണ് ദീന്‍ ദയാല്‍ ഉപാദ്ധ്യായ ഗ്രാമീണ്‍ കൌശല്യ യോജന (ഡി.ഡി.യു.-ജി.കെ.വൈ). ഗ്രാമീണ യുവാക്കളുടെ തൊഴില്‍ പ്രതീക്ഷകള്‍ക്ക് വൈവിധ്യം നല്‍കികൊണ്ട് ഗ്രാമീണ കുടുംബങ്ങളുടെ വരുമാന സ്രോതസ്സുകള്‍ വൈവിധ്യവല്‍ക്കരിക്കുന്നതിന് പദ്ധതി ലക്ഷ്യമിടുന്നു. 15 നും 35 നും മദ്ധ്യേ പ്രായമുള്ള ഗ്രാമീണ യുവാക്കളെയാണ് പദ്ധതി കേന്ദ്രീകരിക്കുന്നത്. കേരളത്തില്‍ ഈ പദ്ധതി നടപ്പിലാക്കുന്നതിനുള്ള നോഡല്‍ ഏജന്‍സി കുടുംബശ്രീയാണ്. പരിശീലനം നല്‍കുന്നതിന് വിവിധ വ്യവസായങ്ങളെ തമ്മില്‍ ഈ പദ്ധതി ബന്ധിപ്പിക്കുന്നു. വ്യവസായ കൂടിച്ചേരല്‍ ഉണ്ടാകുന്നതിലൂടെ വിദ്യാര്‍ത്ഥികള്‍ക്ക് വ്യവസായങ്ങളില്‍ തൊഴില്‍ ലഭിക്കുന്നു.

ക്രാഫ്റ്റ്സ്മാന്‍ ട്രെയിനിംഗ്

വിവിധ പ്രാദേശിക വ്യവസായങ്ങളിലേക്ക് നൈപുണ്യം നേടിയ തൊഴിലാളികളുടെ സ്ഥിരതയാര്‍ന്ന ഒഴിക്കിനു വ്യാവസായിക പരിശീലന വിഭാഗത്തിന് കീഴില്‍ 87 ഗവണ്മെന്റ് ഐ.ടി.ഐ. കളും ഒരു അടിസ്ഥാന പരിശീലന കേന്ദ്രവും, ഒരു സ്റ്റാഫ് പരിശീലന ഇന്‍സ്റ്റിറ്റുട്ടും, രണ്ട് എ.വി.റ്റി.എസ്, 486 സ്വകാര്യ ഐ.റ്റി.ഐകള്‍, പട്ടിക വര്‍ഗ്ഗ വകുപ്പിന് കീഴില്‍ പട്ടിക വര്‍ഗ്ഗക്കാര്‍ക്കുള്ള ഐ.റ്റി.ഐ എന്നിങ്ങനെ പ്രവര്‍ത്തിക്കുന്നു. ഇതു കൂടാതെ 44 ഐ.റ്റി.ഐകള്‍ പട്ടിക ജാതിക്കാര്‍ക്ക് മാത്രമായും 2 ഐ.റ്റി.ഐകള്‍ പട്ടിക വര്‍ഗ്ഗക്കാര്‍ക്കു മാത്രമായും യഥാക്രമം പട്ടികജാതി വികസന വകുപ്പിന് കീഴിലും പട്ടിക വര്‍ഗ്ഗ വികസന വകുപ്പിന് കീഴിലുമുണ്ട്. ഏകദേശം 85 ബ്രാഞ്ചുകളില്‍, മൊത്തം 97,038 സീറ്റുകളില്‍ ക്രാഫ്റ്റ്സ്മാന്‍ ട്രെയിനിംഗിനു മാത്രമായി സീറ്റുകള്‍ മാറ്റി വെച്ചിട്ടുണ്ട്. ഐ.റ്റി.ഐ കളുടെയും അവയുടെ വിവിധ ബ്രാഞ്ചുകളുടെയും വിശദ വിവരങ്ങള്‍ അനുബന്ധമായി ചേര്‍ത്തിട്ടുണ്ട്. അനുബന്ധം 4.1.63, 4.1.64, 4.1.65, 4.1.66, 4.1.67, 4.1.68, 4.1.69.

അപ്പ്രന്റീസ്ഷിപ്പ് പരിശീലനം

1961 ലെ അപ്പ്രന്റീസ്ഷിപ്പ് നിയമം അനുസരിച്ച് അപ്പ്രന്റീസ്ഷിപ്പ് പരിശീലന പരിപാടികള്‍ നടത്തി വരുന്നു. അപ്പ്രന്റീസ്ഷിപ്പ് പരിശീലന പരിപാടികള്‍ നിയിന്ത്രിക്കുകയും അതു വഴി നിലവാരമുള്ള പാഠ്യപദ്ധതി, പരിശീലന കാലയളവ്, നൈപുണ്യങ്ങള്‍ ഉറപ്പാക്കല്‍ തുടങ്ങിയവയാണ് ഈ നിയമത്തിന്റെ പ്രധാന ലക്ഷ്യങ്ങള്‍. വ്യവസായങ്ങളില്‍ തൊഴില്‍ നൈപുണ്യമുള്ള തൊഴിലാളികളുടെ ആവശ്യം സാധൂകരിക്കുന്നതിനായി വ്യവസായശാലകളിലെ സൗകര്യം പ്രയോജനപ്പെടുത്തി നൈപുണ്യ പരിശീലനം നല്‍കുന്നു. അപ്പ്രന്റീസ്ഷിപ്പ് എന്നത് അപ്പ്രന്റീസും തൊഴിലുടമയും തമ്മിലുള്ള ഒരു ഉടമ്പടിയാണ്. ഒരു നിശ്ചിത കാലയളവില്‍, ഒരു പ്രത്യേക നൈപുണ്യം വികസിപ്പിച്ചെടുക്കുന്നതിന് പരിശീലിപ്പിക്കുകയും, പ്രസ്തുത കാലയളവില്‍ അപ്പ്രെന്റിസ്ഷിപ്പ് നിയമം അനുസരിച്ചുള്ള ഒരു ധന സഹായം നല്‍കുകയും ചെയ്യുന്നു. കേന്ദ്ര/സംസ്ഥാന സര്‍ക്കാരുകള്‍ ഒരു മൂന്നാം കക്ഷിയായി ഈ ഉടമ്പടി നിയന്ത്രിക്കുകയും മേല്‍നോട്ടം വഹിക്കുകയും ചെയ്യുന്നു. ഈ നിയമം അനുസരിച്ച് വ്യവസായ ശാലകളിലെ നൈപുണ്യ പരിശീലനത്തിനുള്ള സൌകര്യങ്ങളും സാധ്യതകളും ഉപയോഗപ്പെടുത്തുകയും നാഷണല്‍ കൗണ്‍സില്‍ ഫോര്‍ വൊക്കേഷണല്‍ ട്രെയിനിംഗ് സെര്‍ട്ടിഫിക്കേഷന്‍ നല്‍കുകയും ചെയ്യുന്നു. കേരളത്തിലെ ട്രേഡ് അപ്പ്രന്റീസ്ഷിപ്പ് ട്രെയിനിംഗ് കേന്ദ്ര സംസ്ഥാന സര്‍ക്കാരുകളുടെ സംയുക്ത മേല്‍നോട്ടത്തില്‍ നടത്തുന്നു. സംസ്ഥാനത്തെ അപ്പ്രന്റീസ്ഷിപ്പ് പദ്ധതികള്‍ 9 ജില്ലകളില്‍ ഇന്‍സ്ട്രക്ഷന്‍ സെന്ററുകള്‍ വഴിയും ബാക്കി 5 ജില്ലകളില്‍ ഐ ടി ഐ മുഖേനയും നടത്തി വരുന്നു.

81 തൊഴിലുകളുടെ ട്രേഡുകള്‍ അപ്പ്രേന്റിസ്ഷിപ്പ് ട്രെയിനിംഗിന് നീക്കി വെച്ചിട്ടുണ്ട്. 10,422 സീറ്റുകള്‍ ഈ പദ്ധതി പ്രകാരം നീക്കി വയ്ക്കുകയും, അതില്‍ 4,328 സീറ്റുകള്‍ ഉപയോഗപ്പെടുത്തുകയും ചെയ്തിട്ടുണ്ട്. ഈ പദ്ധതി പ്രകാരം 2,000 ത്തോളം ട്രെയിനിംഗ് സെര്‍ട്ടിഫിക്കറ്റുകള്‍ നല്‍കി വരുന്നു. 50 ശതമാനം അപ്പ്രന്റീസ്ഷിപ്പ് നിയമനം സംസ്ഥാനത്ത് ഗവണ്മെന്റ് മേഖലയില്‍ നടത്തി വരുന്നു.

നൈപുണ്യ വികസന പദ്ധതികള്‍

നൈപുണ്യ വികസന പദ്ധതികളുടെ ലക്ഷ്യം സ്കൂള്‍ വിദ്യാഭ്യാസം പൂര്‍ത്തിയാക്കുന്നതിന് മുന്‍പ് വിട്ടുപോന്നവര്‍ക്കും, നിലവില്‍ അസംഘടിത മേഖലയില്‍ ജോലി ചെയ്യുന്നവര്‍ക്കും സൗജന്യ തൊഴില്‍ വൈദഗ്ധ്യം കൊടുക്കുക എന്നതാണ്. നിലവില്‍ ഉള്ളവരുടെ നൈപുണ്യം/വൈദഗ്ധ്യം ഈ പദ്ധതിയിലൂടെ പരിശോധിക്കുകയും സാക്ഷ്യപ്പെടുത്തുകയും ചെയ്യുന്നു. വിജയകരമായി പരിശീലനം പൂര്‍ത്തിയാക്കുന്ന ട്രെയിനികള്‍ക്ക് എന്‍.സി.വി.റ്റി യുടെ സാക്ഷ്യ പത്രവും നല്‍കുന്നു. കേരളത്തില്‍ നൈപുണ്യ വികസന പരിപാടികള്‍ നടപ്പിലാക്കുകയും നിരീക്ഷിക്കുകയും ചെയ്യുന്നത് വ്യാവസായിക പരിശീലന വകുപ്പാണ്.

സ്കില്‍ അപ്പ് ഡേറ്റിംഗ് ഇന്‍സ്റ്റിറ്റ്യൂട്ട് ഫോര്‍ സ്റ്റാഫ് ട്രെയിനിംഗ്

സാങ്കേതിക വികസനത്തിനനുസരിച്ചു സാങ്കേതിക മികവില്‍ അദ്ധ്യാപകര്‍ക്കും, മറ്റുള്ളവര്‍ക്കും പരിശീലനത്തിനായി കേരളത്തില്‍ സ്റ്റാഫ് ട്രെയിനിംഗിന് ആയുള്ള നൈപുണ്യ വികസന ഇന്‍സ്റ്റിറ്റ്യൂട്ട് 1999 ല്‍ തിരുവനന്തപുരത്ത് കഴക്കൂട്ടത്താണ് ആരംഭിച്ചത്. പരിശീലന കോഴ്സുകള്‍ തയ്യാറാക്കുക, പുതിയ പഠന രീതികള്‍ക്കായി ഗവേഷണം,സാങ്കേതിക ഉദ്യോഗസ്ഥരുടെ നൈപുണ്യ വികസനം, സംസ്ഥാന പരിശീലന നയത്തിന്റെ ഭാഗമായി ഐ.എം.ജി.യില്‍ പരിശീലനം, ഓഫ് ക്യാമ്പസ് പരിശീലനം, വെര്‍ച്വല്‍ ക്ലാസ്സ് ട്രെയിനിംഗ്, ഡി.ജി.ഇ. & റ്റി യുടെ ഡി.എല്‍.പി ട്രെയിനിംഗ് ഏകോപിപ്പിക്കല്‍ എന്നിവയാണ് ഈ ഇന്‍സ്റ്റിറ്റ്യൂട്ടിന്റെ പ്രവര്‍ത്തനങ്ങള്‍.

കേരള അക്കാദമി ഫോര്‍ സ്കില്‍സ് എക്സലന്‍സ് (കെ.എ.എസ്.ഇ)

പൂര്‍ണ്ണമായും കേരളാ ഗവണ്മെന്റിന്റെ ഉടമസ്ഥതയിലുള്ള സെക്ഷന്‍ 25 പ്രകാരമുള്ള കമ്പനിയാണ് കേരളാ അക്കാദമി ഫോര്‍ സ്കില്‍സ് എക്സലന്‍സ്. സംസ്ഥാനത്തുടനീളം പ്രത്യേക നൈപുണ്യ വികസന കോഴ്സുകള്‍ വഴി മാനവവിഭവ ശേഷി വികസനത്തിന് സൌകര്യമൊരുക്കുക എന്നതാണ് ഈ കമ്പനിയുടെ ലക്ഷ്യം. ആതിഥ്യം, വിനോദസഞ്ചാരം, ഐ.റ്റി ആന്റ് ഐ.റ്റി.ഇ.എസ്, ഫിനാന്‍സ്, റീട്ടെയില്‍, നിര്‍മ്മാണ പ്രവര്‍ത്തനങ്ങള്‍ തുടങ്ങിയവയാണ് പ്രമുഖ പൊതു സ്വകാര്യ വ്യവസായങ്ങളുടെ പങ്കാളിത്തത്തോടുകൂടി വിഭാവനം ചെയ്യുന്നത്. വിവിധ വിഭാഗത്തില്‍പ്പെട്ട തൊഴിലാളികള്‍ക്ക് ശാസ്ത്രീയമായി രൂപ കല്പന ചെയ്ത പ്രത്യേക തരം കോഴ്സുകള്‍ വഴി വ്യവസായ സംരംഭങ്ങളിലെ എല്ലാത്തരം ജോലികള്‍ക്കുമായി വളരെ ഉയര്‍ന്ന കാര്യശേഷിയുള്ള പ്രോഫഷണലുകളായ തൊഴിലാളികളെ വാര്‍ത്തെടുക്കുകയാണ് പ്രധാന ലക്ഷ്യം. അനൌദ്യോഗിക കഴിവിനെയും സാങ്കേതിക കഴിവിനെയും ശക്തിപ്പെടുത്തുവാനും പരിശീലനങ്ങള്‍ വഴി സാധ്യമാകുന്നുണ്ട്. തോഴിലാളികളെ അന്തര്‍ദേശീയ നിലവാരത്തിലേക്ക് ഉയര്‍ത്തുന്നതിന്റെ ഭാഗമായി അനൌദ്യോഗിക കഴിവുകളായ ആശയ വിനിമയ കഴിവുകള്‍, ഭാഷാ നൈപുണ്യം, സുരക്ഷയെ കുറിച്ചും പരിസ്ഥിതിയെ കുറിച്ചുമുള്ള അറിവുകള്‍ തുടങ്ങിയവയ്ക്കായുള്ള പരിശീലനം നല്‍കേണ്ടത് ആവശ്യമാണ്. എന്തുകൊണ്ടെന്നാല്‍ നമ്മുടെ തോഴിലാളികളും വിവിധ കോളേജുകളില്‍ നിന്നും പഠിച്ച് ഡിഗ്രി എടുക്കുന്ന പ്രൊഫഷണല്‍ വിദ്യാര്‍ഥികള്‍ക്കും ഈ കഴിവുകളുടെ അപര്യാപ്തതയുണ്ട്. മേല്‍നോട്ടം വഹിക്കുന്ന വ്യക്തി മുതല്‍ തൊഴിലാളികള്‍ വരെയുള്ള വിഭാഗക്കാര്‍ക്കായി കഴിവുകള്‍ വര്‍ദ്ധിപ്പിക്കുന്നതിന്റെ ഭാഗമായ പരികല്‍പ്പനാപരവും പ്രായോഗികവുമായ പരിശീലനങ്ങളും നല്‍കുന്നതിനും ഈ സ്ഥാപനം ലക്ഷ്യമിടുന്നു.